Tula

Magpakalalim ngunit huwag magpakalunod,
Tularan ang nauna ngunit huwag ka sumunod,
Magpaanod sa inuuod na lawang malawak,
Dugo ang dumanak sa dwelong baligtad ang talim ng tabak,

Pag-iyak ng talunan di matanggap ang pagkakamali,
Gusto maghari sa palasyo ang leeg ay nakatali,
Pusaling napapaligiran ng mapagkunwaring kapanalig,
Kaagapay sa pagtindig ngunit binabali ang bisig,

Makinig sa mga sonata ng makatang gutom,
Di alam kung kailan hihilom ang sugat at paghuhukom,
Tila butas ng karayom ang pinapasok,
Nabibilang sa daliri ang mga nasa tuktok,

Nilililok ng palad ang direksyon baluktot,
Pilit pinapagalaw ang mundong di umiikot,
Sigalot bumabalot  nagmamasid sa paligid,
Umaani ng palay sa sementadong bukid