Pundasyon

Matutong sumayaw sa lumang tugtugin at ritmo,
Kung pulos kaliwa ang paa walang matatamo,
Magsumamo sa pusong bato hanggang sa lumambot,
Di magtatagal makakasabay ka na sa ikot ,

Sa malumot na daloy na tubig na maiitim,
Isantabi ang kinikimkim paliwanagin ang dilim,
Madilim na kahapon sayo nakaharang,
Ang utang ng nakaraan sayo nakahatang,

Mapanlinlang na hunyango pilit nakikipagkaibigan,
Pagkatapos makuha ang inaasam agad na lilisan,
Punasan ang luhaan ng mga mata ng mga musmos,
Paggalang sa lumikha sa walang kabuluhan ibinuhos,

Pagtutuos ng nasyon sa diputadong naghuhugas kamay,
Hindi masanay sa pagluray sa akala'y gagabay
Anay na sumisira sa pundasyon mga ninuno ang nagtayo,
Matang luhaan ni inang bayan di matuyo tuyo.